ನಾತಿಚರಾಮಿ / Naticharami

ನಾತಿಚರಾಮಿ / Naticharami  – ಎಲ್ಲ ಮರೆತು ಕಾಮದಲ್ಲಿ ತೊಡಗುವುದು ಬಹು ಸುಲಭ. ಆದರೆ ಅದಾದ ನಂತರವೂ ದಿನವಿಡೀ ಒಬ್ಬರನ್ನೊಬ್ಬರು ಆಪ್ತವಾಗೇ ಭರಿಸೋದಿದೆಯಲ್ಲ ಅದು ನಿಜವಾದ ಟೆಸ್ಟು. ಸುಖ ಪಡುವುದಕ್ಕೆ ಕ್ಷಣ ಸಾಕು. ಭರಿಸೋದಕ್ಕೆ ಜನ್ಮವೇ ಬೇಕು.ದೇಹ ಬಸಿದಾದ ನಂತರವೂ ಪರಸ್ಪರ ಬೆರೆತು ಮಲಗಿ ನಿಟ್ಟುಸಿರುಡುವ ಬದಲಿಗೆ, ಅದ್ಯಾಕೋ ನೀನು ಸರಕ್ಕನೆ ಬೆನ್ನು ತಿರುವಿ ಮಲಗತೊಡಗಿದ್ದೀ ಎಂದಾದರೆ, ತುಂಬ ಹಿಡಿಸುವ ನನ್ನ ಕಮ್ಮಗಿನ ಬೆವರು ಮತ್ತದರ ಗಂಧದ ಸಾನಿಧ್ಯವೂ ಆಗಿಬರುತ್ತಿಲ್ಲ ಎನ್ನಿಸಿಬಿಟ್ಟಿದ್ದರೆ ಅವತ್ತೇ ನಾನು ನೀನಿದ್ದ ಎಂಟನೆಯ ಮಹಡಿಯಿಂದಲೇ ಹಾರಿಕೊಂಡುಬಿಡುತ್ತಿದ್ದೆ.

ಆದರೆ ನಿನ್ನೊಂದಿಗಿರುವ ದಿನದ ಅಷ್ಟೂ ಗಂಟೆ ಕೂಡಾ ಮರೆತುಹೋಗುವಂತೆ ಅದ್ಭುತ ಎನ್ನಿಸುತ್ತದಾದರೆ ಅದಕ್ಕೆ ಅಕಾರಣವಾಗಿ ಹುಟ್ಟಿಬಿಡುವ ಪ್ರೇಮವೇ ಹೊರತು ಇನ್ನೇನಲ್ಲ. ಮನಸ್ಸಿಗೆ ಬಾರದ ಪ್ರೇಮ ಕಾಮವನ್ನು ತರುತ್ತದೆಂದು ಹೇಳಿದವಳಾರು..?

ಹೇಳಿದ್ದೇ ಆದರೆ ಆಕೆ ಹೆಣ್ಣಲ್ಲ.

ಅಂಥವಳ ಜತೆ ಮಲಗಿ ಎದ್ದು ಹೋಗುವವನು ಗಂಡಸೂ ಅಲ್ಲ.